كريم العدل ينتقد أوردر تصوير 54 ساعة فى فيلم محمد رمضان "هارلى"

نشر المخرج كريم العدل عبر حسابه بموقع التواصل الإجتماعى "فيسبوك " رسالة منتقدا فيها أوردر تصوير فيلم "هارلى" الذى سيعرض فى عيد الفطر الأوردر بدأ من الجمعة 4 فجرا وإنتهى الأحد 10 صباحا أى 54 ساعة متواصلة.اضافة اعلان

طالب المخرج كريم كرو عمل الأعمال الفنية بعدم الموافقة على العمل أكثر من الساعات المعترف بها .

كتب:"انا ومخرجين كتير غيري، بنحارب طول الوقت على فكرة اننا مش هنصور اكتر من ١٤ ساعة في اليوم -اللي هو اصلا كتير على فكرة- غير في الضرورة القصوى… و فجأة نتفاجئ بأوردر تصوير بيبدأ الساعة ٤ فجر الجمعة.. و بيخلص الساعة ١٠ صباحا يوم الحد؟!! ٥٤ ساعة؟؟!!!! و المفاجأة بقى انه ((فيلم)) كمان مش مسلسل مثلا، فمضغوطين علشان يسلموا الحلقات في رمضان ولا اى حاجة -رغم ان برضه المبدأ مرفوض تماما بس يجوز تفهمه".

وتابع:"فيعني ايه؟ و ازاي؟ و ليه الناس موافقة؟ و مين اللي إدى الحق للمنتج او المخرج انهم يعملوا اوردر ٥٤ ساعة؟؟ و يعني ايه ممثل يقف قدام الكاميرا و هو بقاله فوق ال٤٨ ساعة مابينامش؟؟ يعني ايه كرو إضاءة و پانثر يبقوا بيشيلوا معدات و يحطوا و ينزلوا و يطلعوا لمدة تفوق ال٤٨ ساعة؟؟ طيب فين النقابة؟؟ و هل السوق ده بقى ماشي بالسُخرة؟؟ هل الكرو تحول الى عبيد بالنسبة لكم؟؟!! طيب هل المنتج هيدفع اجر الناس يومين و نص ولا ٣ ايام ولا هيدفع بزيادة علشان يعوضهموأضاف محذرا:"طيب لو حد بعد الشر جرى له حاجة ولا مات -و شوفناها و حصلت قبل كده- مين اللي هيتحمل المسؤولية؟.

وقال:"طيب لو المخرج -اللي انا شخصيا اول مرة اسمع اسمه- مش خايف على نفسه ولا على شغله ولا على صحته، احنا ذنبنا ايه؟ هو مش فاهم انه بيضر السوق كله؟؟ و ان غالبا بعد شوية ده بيتحول للعادي، و ان طالما حصلت مرة يبقى ليه ماتحصلش تاني؟؟ مش فاهم ان عنده زملا بيحاربوا في كل مشروع سواء فيلم او مسلسل علشان مايحصلش في الكرو بتاعهم كده؟

أنهى كريم العدل رسالته قائلا:"عامة انا اول مرة اسمع اسم المخرج، و اول مرة اسمع اسم شركة الانتاج.. و مع كامل احترامي ليهم احب اقول لهم حرام عليكم و عيب.. و احب اقول للصناع و الكرو و الناس اللي ورا الكاميرا من فضلكم ماتسكتوش يا جماعة.. ده مش عادي ولا طبيعي!! كفاية عبث في الشغلانة… العبث اللي فيها مكفيها والله".

جدير بالذكر كشف مصمم المعارك بفيلم "هارلى" إنتهاء تصوير الفيلم بطولة الفنان محمد رمضان والمقرر عرضه فى موسم عيد الفطر المقبل.

ونشر عصام الوريث صورة من الكواليس عبر حسابه بموقع التواصل الإجتماعى "فيس بوك"قائلا:"بعد 54 ساعة تصوير متواصله فركش فيلم #هارلي هتشوفو عظمه في العيد ان شاء الله».

فيلم هارلى يقوم ببطولته محمد رمضان،مي عمر،محمود حميدة،أحمد داش،مي كساب،إسماعيل فرغلي،حسني شتا،تأليف محمد سامي ،محمد سميرمبروك،مدير التصوير أحمد عبد القادر وإخراج محمد سمير.