بيظهر قوته على حيوان عاجز ..انتقادات للسقا بسبب قطع رأس الثعبان

تعرض النجم احمد السقا لانتقادات بسبب مشهد عضه لرأس الثعبان فى ثاني حلقات برنامج المقالب الشهير " رامز نيفر إيند " الذى يعرض على قناة Mbc مصر.

وكتب أسامة العسكري وهو طبيب بيطري على صفحته بفيس بوك " شايف مشهد أحمد السقا وهو بيقطع راس التعبان ويرميه مشهد جاهل ومؤذي الحقيقة. وفي رأيي مايختلفش كتير اوي عن اللي رمى قطة قدام العربية. اضافة اعلان
قتل غير ضروري مابيخدمش أي هدف إلا إظهار القوة على حيوان عاجز مغلوب على أمره.
الناس بتقتل الحيوانات ل٣ أسباب: الخوف، أو الجهل، أو السادية. والإعلام ليه دور في التلاتة. الحيوانات دايمًا بتظهر باعتبارها أداة للمنظرة والاستمتاع وفرض القوة.
البطل بيرسخ لتعامل جاهل مع الحيوانات من خلال إفيهات سخيفة ومكررة.. يخوّفنا من كلب مسالم بس لونه أسود، أو يتريق اللي بيصرف على قطته، أو بيستعرض قوته على حيوان بري.
التعبان اللي السقا قطع راسه والناس صقفت له، واضح جداً إنه تعبان غير سام، زيه زي أي سحلية أو سنجاب عايز يعيش ويتساب في حاله.
حتى التعابين السامة (اللي بتمثل أقل من ٢٠٪ من التعابين) مش بتمشي تدور ع البني ادمين عشان تعضهم، ده مجرد مخلوق بري بيبحث عن أكل وبيت وشريك، لو ظهرت في طريقه وحس بالتهديد والخوف على حياته بيعضك كدفاع عن نفسه مش عشان انت فريسته.
مافيش كائن بيمشي يدور على أذى بدون هدف غير البني ادمين.



ايضا علقت منة الزهيري وهى فنانة ومنشيء محتوي رقمي يتابعها حوالى 490 الف شخص " مفيش اي لذاذه الحقيقة في مشهد احمد السقا مع التعبان .. غير ان دا شيئ همجي ..محتاج منه علاج نفسي"